伊利沙伯二世
女王陛下 伊利沙伯二世 | |
---|---|
大不列顛及北愛爾蘭聯合王國 及其他英聯邦王國女王: 英國、 加拿大、 澳洲、 紐西蘭 :1952至今 | |
現任 | |
就任日期 1952年2月6號 | |
前任 | 佐治六世 |
繼任 | 現時英聯邦王國太子:查理斯王子 |
個人資料 | |
出世 |
英國英格蘭倫敦梅費爾布魯頓街17號 | 1926年4月21號
配偶 | 菲臘親王 |
伊利沙伯二世(英文:Elizabeth II,1926年4月21號—),原名伊利沙伯·亞歷山大·瑪麗(Elizabeth Alexandra Mary),係現任英國君主、其他英聯邦王國君主、同埋英聯邦嘅元首,響1952年2月6號登基,繼承老竇佐治六世嘅王位,成為英國、加拿大、澳洲、紐西蘭、南非、巴基斯坦同錫蘭女王。在位幾十年蒞,以渠為元首嘅國家隨住去殖民化浪潮有所增減,現時渠係英、加、澳、紐同其他十二個喺佢登基後獨立嘅牙買加、巴巴多斯、巴哈馬、格林納達、巴布亞新畿內亞、所羅門群島、圖瓦盧、聖露西亞、聖文森特和格林那丁斯、伯利兹、安提瓜和巴布達同埋聖基茨和尼維斯[註 1]嘅女王,其餘國家則改制為共和國,廢除咗渠作為君主嘅地位。渠亦都係英國國教會嘅最高首領。香港人亦都就噉叫佢做英女王或事頭婆。
原本佢作為國王佐治五世嘅二仔嘅女,本來唔會繼承王位,但係由於佢伯父愛德華八世「不愛江山愛美人」而退位,再加上佢本身冇兄弟,先至可以繼位。而由於父王因病早逝而令佢芳齡繼位,而家伊利沙伯二世已經超越太太嫲維多利亞女皇,成為英國史上做得最耐嘅君主[2],兼且係英國最長命君主。2016年泰國蒲眉王過身後,佢做咗當今全世界在位最耐嘅國家元首。
女王名義上嘅權力遠大過實權。英國政府同加拿大政府正式名係「女王陛下政府」(Her Majesty's Government)。喺英國程序上由女王負責任命大臣,實際上依英國嘅民主憲政慣例,女王聽從首相嘅建議而唔係任意選擇大臣、官員。女王會喺首相要求下解散議會,去進行大選。而喺大選中取得勝利的政黨領袖,就要得到女王邀請先會正式拜相。首相一職一般由下議院多數黨領袖擔任,然後由首相「建議」女王任命其他內閣成員。而英國政府並唔向女王負責,而係向下議院負責,即間接噉向英國選民負責。佢亦係名義上嘅三軍統帥,但按國防大臣建議行事。女王亦參與到國家嘅司法體制中,法官名義上由佢委任,法庭以佢嘅名義行事,政府亦以女王名義提起公訴、簽發車牌同護照。所以女王唔需要車牌(雖然佢識揸車)同護照,法理上亦唔會畀人告。
由於女王長期留喺英國,佢原則上唔會,亦唔得閒參與其餘15個國家絕大多數嘅政治活動。女王會委仼由當地總理或國會「建議」嘅人選出仼總督一職,幫女王本人喺當地執行職務,亦因為女王喺嗰啲國家冇乜實際角色意義,因此嗰啲國家甚至會有民眾唔知道佢係自己國家嘅元首。
正因女王只係象徵性元首,缺乏實質政治意義,喺女王唔協調英聯邦王國外交政策下,佢喺國際衝突中嘅角色顯得矛盾。例如喺1970年代美國入侵格林納達中,佢統治嘅牙買加等七國出兵幫美國入侵同樣屬於自己嘅格林納達,但英國政府表示反對出兵,變相係「自己嘅政府反對效忠自己嘅軍隊入侵另一個由自己統治嘅國家」。又如儘管各國要奉行只承認一個中國嘅原則,但名義上佢同時有統治承認中華人民共和國(例如英國)同中華民國(例如伯利茲)嘅國家,變相同時承認「兩個中國」。
作為英聯邦元首,佢出席歷屆英聯邦首腦會議。雖然個職位唔係世襲,但大英國協各國喺2018年嘅會議後,仍認同下一仼元首將由王儲查爾斯王子繼仼。
佢亦係一位賽馬發燒友,英國名駒「嘉登行宮」嘅馬主就係佢本人,超過九十歲嘅佢有時重會騎馬。女王亦都鍾情於哥基犬,佢第一隻哥基犬Susan由父王佐治六世贈送,並繁殖咗十四代,自此哥基可以話陪伴咗女王大半生,包括一齊拍2012年倫敦奧運宣傳片。但由於年歲已高,佢已唔再繁殖哥基犬,最後一隻Susan嘅後代Willow喺2018年4月15號逝世,不幸消息打擊女王[3][4]。
參考[編輯]
- ↑ Bartram, Graham (2010). Flying Flags in the United Kingdom: A Guide to Britain's Flag Protocol (PDF). Flag Institute. pp. 15–16. ISBN 978-0-9513286-1-3.
- ↑ 女皇在位63載 成英最長久君主
- ↑ "英女王與柯基犬的一世情緣" (中文). 中時電子報.
- ↑ Queen Elizabeth II Loses Her Last Corgi, Willow, Marking The End Of A Scrappy Canine Dynasty
引用錯誤 <ref>
tags exist for a group named "註", but no corresponding <references group="註"/>
tag was found